Heb 12 | KMG | STEP | Wišec guru sâko iŋucnezi karorac tinac erâ orâŋ-nâpoŋgopieŋte wiac bâmâc-nâpoekac i hetera-fârenšepeneŋ, â sâqocnere muczi fâfâc-nâpoekac i wâc hetâcnenšepeneŋ, ehuc hata nâwotukicne ira tatakic tâmiric gagasac jaha ranšepeneŋ.

Hebrews 12

Jesuzi micne banârewecte e bâjâpehuc sanaŋkezo

1 Wišec guru sâko iŋucnezi karorac tinac erâ orâŋ-nâpoŋgopieŋte wiac bâmâc-nâpoekac i hetera-fârenšepeneŋ, â sâqocnere muczi fâfâc-nâpoekac i wâc hetâcnenšepeneŋ, ehuc hata nâwotukicne ira tatakic tâmiric gagasac jaha ranšepeneŋ. 2 Ehuc Jesu, mamanasiŋte micne bapa â mamanasiŋte fârine bâbâfua, erao findendeŋnehuc junšepeneŋ. E šeri bubiaŋ fuacneocte mukicne irec manasuhuc maripoŋte šâic manawec â mimi faio fefe mana suawec. Iŋuc erâ Anuture ŋeŋefuŋko mefârenao fewec ŋekac. 3 Sâqocne bapa jaŋe mukac mupe mo iŋucne ecnepie mana-bipierâ sanaŋkewec, ŋoŋe ere hâcne manasuhuc mi takirepie maŋŋeŋic betaŋkezejec.

Anutuzi ba bâtiŋ enâreekac irec dâŋ

4 Ŋoŋe sâqocnezi herokawec-ŋopazo eme samandiŋkerâ sahac-ŋeŋic bapie wozeme dodoma, i juwarehuc iŋuc sâcne mi embiŋ. 5 Erâ dâŋ moc “ŋokâ” muŋarehuc faŋ qaŋarekicne fokac irec nikec-ŋopawec me? Dâŋ šiŋuc:

“Ŋokâ-nane, Wofuŋzi bâtiŋgume manatec
wawahane mi ezejec,
â bâšâicgume maŋge mi rokawezejec.
6 Wofuŋ e ŋic moc jauŋkezo murâ ba bâtiŋ ecneekac,
â ŋic fuŋfuŋfâcne bacjopahuc qa qâtiŋ ejare-fâreekac.”
7 Wofuŋzi ba bâtiŋ eŋarezo mume hâbi-ŋeŋic mi ŋeŋgoroŋkezejec. Anutuzi honec-ŋopame naru motecfâc-ticne epie iŋuc hâcne eŋareekac. Me mo mamaczi ŋokâ-ticne ba bâtiŋ mi ecneocmu? 8 Ba bâtiŋ i ŋic gâcne sasawa ejarewec, eme ŋoŋe i tâmiric jupie ine naru motecfâcne mâcne, fiuckonec fuakicne muŋarezo. 9 Erâ moc mupe: Mâreŋ mamacfâc-nâŋec jaŋe qa bâtiŋ enârepie araŋ bajare jumbeneŋ. Eme qâqâtâcte Mamac e araŋ bašihuc bacnepene sâckeocmu. Iŋuc ehuc juhâmonaŋmu. 10 Jaŋe mamana-jeŋicte sâc jara dameŋ bembeŋne sawa qa bâtiŋ enâre jumbieŋ, eki ine wiac fârine fua-nâreocte enâreekac, e jahacne tiri jujuo šuhuckenaŋte hâcne. 11 Bâbâtiŋ fuaocmu sâc i qanaŋ manapene bubiaŋhec mi ehuc busâqochec eekac” â šâhecko ine bâbâtiŋko juhuc sanaŋkeeŋgopieŋ jaŋerao fârine wamane fuaekac, šâŋene bahac fâsâc juju.

Sasanaŋ bâfuarâ dodopec ezo

12 Eme ŋoŋe meŋeŋic betaŋkekicne â hoqaŋeŋ-ŋeŋic ŋetarakicne, irec âte tiŋnehuc sanaŋkenšepieŋ. 13 Ehuc hata bâšâwepie wiŋkeme ŋoŋeraonec puriŋ ekicnezi ira qac qâsoric tâmiric âte rahuc biaŋkenšepieŋ. 14 Ŋoŋe ŋic mâmâc sasawa jaŋehec wamao jujure giene banšepieŋ, erâ maŋfuru erâ juniŋte henširiŋnenšepieŋ, maŋwânâŋhec juku Wofuŋ hohone i mi fokac. 15 Ŋoŋeraonec moczi Anuture aki anonoc ririzacte soŋaŋ babac enšepieŋ. Erâ ŋondeŋ-ŋeŋicko šâŋ opac moczi gitec herâ šacŋopame sâqorenšipiŋte rucŋeŋic banšepieŋ. 16 Erâ ŋoŋeraonec moczi Esaure hata mi âtehuc sasecŋic â ŋic araŋ bapa tâmiric mi ezejec. E nânâ mocjaha mac irec erâ mârâc fufuare merâfâc qikiŋnewec. 17 Ŋoŋe ere manaeŋgopieŋ, e šâhec jambuŋ rozo mume sakarecnekicne. E wiac ewec i suame arictac eocte kio-bipiehuc emâmâŋkewec.

Nâŋâc Sinai tiki mâcne, Zioŋ tiki maickembeŋ

18 Ŋoŋe tiki moc ba bâuac eene, šocbâruŋnehec ira mi ra fisimbiŋ, erâ hâweŋ, dapâc â mâŋâŋ šâšâkiriŋne irec maŋnao mi rašimbiŋ. 19 Erâ qeŋfânâŋ sâko â dâŋowa i wâc mi manambiŋ. Manambiŋzi dâŋ niniŋkeocte numu huacbuc embiŋ. 20 Dâŋ kecšiŋuc mukicne, irec manapie hâhâwicne ewec: “Qowi tiki âteuame qânâzi hehâmozo.” 21 Wiac i bipic tatarane hec fuakume Mosezi muwec: “No hâwicnume ɋarac ɋarac qakopac.” 22 Ŋoŋe tiki iŋucnao mâcne, ŋoŋe Zioŋ tiki, Anutu jujune ere hae sâkoo, sambâŋte Jerusalemko fisimbiŋ. Ehuc aŋelo mi wowosec-jopane â šeri tutumaŋ sâko 23 â fuŋfuŋ gurufâc-ticne šâŋejeŋic sambâŋko qâreŋkekicne jaŋe hâcne maic-jopambiŋ. Ehuc Anutu, ŋic sasawa nâŋâcne mumutara maickembiŋ, â ŋic tiŋne furu bacjopakicne qâqâtâcfâc-jeŋic jaŋerao šuhuckembiŋ” 24 â Jesu, šâšâfic ɋâricnere jâcne, erao fisirâ rurua soc maickembiŋ, soc izi Abe socticnezi wira wâwâsic ewec iŋuc mâcne, sâc moc wira wâwâsic eekac.

Anutuzi juku mâreŋ itiriŋkeme ŋerisieocmu

25 Ŋoŋe dâŋ ŋazaekac e râpeckenšipiŋte ruc bahuc junšepieŋ. Mârâc jaha mâreŋko waharâ dâŋ jazame qikiŋnepie okacne fisi-jarewec. Eme ši sambâŋko juhuc dâŋ nâzâekac, e râpeckerâ wemocko okac tâmiric junaŋmu. 26 Mârâc jaha dâŋ mume mâreŋ qiriŋ qawec. Eme ši ine dâŋticne šiŋuc fokac: No juku mâreŋ mocwâc itiriŋkehuc sambâŋ mâmâc itiriŋkepemu. 27 Mocwâc itiriŋkepemu, iŋuc muwec, ine wiac bâfuakicne i itiriŋkeme ŋerisieocte manasuhuc muwec. Ŋerisieme fofo sanaŋ i fuarâ qiriŋmâc fozokac. 28 Nâŋâc uucmaŋ moc qiriŋmâc fofo sanaŋ rauckenaŋmu, irec Anutu mucne bacnenšepeneŋ, ehuc rumerâ araŋ bacnehuc, jahac maname biaŋkeekac irec sâcko kiŋaŋ qacnenšepeneŋ. 29 Ehuc šiŋuc mananšepeneŋ: Anutunâŋec e šocbâruŋ iŋucne.